Mito mithili ya nyoka, bondeni yatiririka,
Yakunja na kukunjuka, sauti tamu yasikika,
Nyikani yabubujika, rangi nzuri yachipuka,
Karibuni Tanzania, nchi inayopendeza.
Tazama yake mandhari, hakika utavutiwa,
Pepo nzuri za bahari, maji matamu ya ziwa,
Nyuso zenye utayari, nchini utapokewa,
Karibuni Tanzania, nchi inayopendeza.
Wanyama tele mbugani, Duniani wasifika,
Twiga warefu nchini, kama nembo watumika,
Sokwe-mtu nao nyani, wanyama wenye pilika,
Karibuni Tanzania, nchi inayopendeza.
Visiwani panukia, marashi ya karafuu,
Hujambo! Wakwamkia, wote ni wachangamfu,
Vivutio asilia, vyapendeza maradufu,
Karibuni Tanzania, nchi inayopendeza.
Wadudu pia mimea, nchi yeu waipamba,
Kijani iloenea, yapendezesha mashamba,
Ndege walonenepea, amani yetu waimba,
Karibuni Tanzania, nchi inayopendeza.
Makabila yapo mengi, na hakuna ubaguzi,
Hatujigawi kwa rangi, twachukia uchochezi,
Ucheshi ndio msingi, hatupendi uchokozi,
Karibuni Tanzania, nchi inayopendeza.
Kiswahili lugha tamu, ndiyo lugha ya taifa,
Kiungo cha ukarimu, pasipo kuleta ufa,
Chasukuma gurudumu, na kujenga utaifa,
Karibuni Tanznaia, nchi inayopendeza.
Mwenge wetu wa uhuru, chemichemi ya amani,
Nchini watoa nuru, hata kwa ninyi wageni,
Amani kutokufuru, kwetu ni utamaduni,
Karibuni Tanzania, nchi inayopendeza.
Mlima Kilimanjaro, paa letu Africa,
Unakinga migogoro, Tanzania kuibuka,
Zikitokea kasoro, barafu yazifunika,
Karibuni Tanzania, nchi inayopendeza.
Kwa usawa twatukuka, haki kuipigania,
Kusini mwa Afrika, uhuru tulitetea,
Wadhalimu kuwafyeka, barani kutokomea,
Karibuni Tanzania, nchi inayopendeza.
Utamaduni asili, Tanzania twautii,
Mila zetu mbalimbali, zavutia watalii,
Najua mnakubali, kabila la WAMASAI,
Karibuni Tanzania, Kisiwa chenye amani.
Maporomoko ya maji, ardhini yarindima,
Karibu wawekezaji, kwenye nchi nayovuma,
Penye miji na vijiji, na watu wenye karama,
Karibuni Tanzania, Mfurahie amani.
